ಕನ್ನಡ, ಕನ್ನಡಿಗ ಮತ್ತು ಕರ್ನಾಟಕ
ಕರ್ನಾಟಕ: ವೈವಿಧ್ಯತೆಯಲ್ಲಿ ಏಕತೆ ಸಾರುವ ವಿಶ್ವಮಾನವನ ನೆಲ! ನಮ್ಮ ಕನ್ನಡಿಗ ಕಳೆದು ಹೋಗಿಲ್ಲ, ಬೆಳೆದು ನಿಂತಿದ್ದಾನೆ!
ಪರಿಚಯ:
'ಸಾವಿರ ನದಿ, ಹರಿಯೋ ಸಾವಿರ ನಾಲಿಗೆ, ನಮಗೆ ಬೇಕು ಕನ್ನಡವೇ ನುಡಿಯೋ ಎರಡು ಕಣ್ಣುಗಳ ನಡುವೆ ಇರೋ ಅಕ್ಷಿ'. ನಮ್ಮ ಕರ್ನಾಟಕದ ಹೆಮ್ಮೆಯ ಕವಿ ಕುವೆಂಪು ಅವರ ಈ ಸಾಲುಗಳು ನಮ್ಮ ನಾಡಿನ ವಿಶಿಷ್ಟತೆಯನ್ನೇ ಬಿಂಬಿಸುತ್ತವೆ. ನಮ್ಮ ಕರ್ನಾಟಕ, ಒಂದು ರಾಜ್ಯಕ್ಕಿಂತ ಹೆಚ್ಚಾಗಿ, ವಿವಿಧ ಭಾಷೆ, ಸಂಸ್ಕೃತಿಗಳ ಸಂಗಮ. ಆದರೆ, ಈ ವೈವಿಧ್ಯತೆಯ ನಡುವೆ ಕನ್ನಡ ಮತ್ತು ಕನ್ನಡಿಗನ ಅಸ್ತಿತ್ವ ನಿಜಕ್ಕೂ ಕಳೆದುಹೋಗಿದೆಯೇ? ಈ ಕುರಿತು ಒಂದು ಚಿಂತನೆ ಇಲ್ಲಿದೆ.
ಭಾಷೆಗಳ ಈ ಮಹಾಪೂರದಲ್ಲಿ ಕನ್ನಡದ ಸ್ಥಾನವೇನು?
ನಮ್ಮ ನಾಡಿನ ಮೂಲೆ ಮೂಲೆಗೂ ಭಾಷೆಯ ವೈವಿಧ್ಯತೆ ಹರಡಿದೆ.
ಬೆಂಗಳೂರು, 'ಸಿಲಿಕಾನ್ ವ್ಯಾಲಿ'ಯಲ್ಲಿ: ಇಂದು ಬೆಂಗಳೂರು ಕೇವಲ ಭಾರತದವರದ್ದಲ್ಲ, ಇಡೀ ಏಷ್ಯಾದ ಸಿಲಿಕಾನ್ ವ್ಯಾಲಿಯಾಗಿ ಬೆಳೆದಿದೆ. ಐಟಿ ಕ್ರಾಂತಿಯ ನಂತರ, ಕನ್ನಡಿಗರ ಸಂಖ್ಯೆ ಕೇವಲ 30% ರಷ್ಟಿರಬಹುದು ಎಂಬ ಮಾತಿದೆ. ಅದರಲ್ಲೂ ಜಯನಗರ, ಸದಾಶಿವನಗರದಂತಹ ಪ್ರತಿಷ್ಠಿತ ಬಡಾವಣೆಗಳಲ್ಲಿ ಕನ್ನಡಕ್ಕಿಂತ ಇಂಗ್ಲಿಷ್ನಲ್ಲಿ ಮಾತನಾಡುವ ಕನ್ನಡಿಗರೇ ಹೆಚ್ಚು.
ಪ್ರಾದೇಶಿಕ ಭಿನ್ನತೆಗಳು: ಕರಾವಳಿಯ ಮಂಗಳೂರಿನ ಕಡೆ ತುಳು ಮಾತೃಭಾಷೆಯಾದರೆ, ಕೊಡಗಿನಲ್ಲಿ ಕೊಡವ ಭಾಷೆ ಕೇಳಿಬರುತ್ತದೆ. ಕೋಲಾರ, ಚಿಕ್ಕಬಳ್ಳಾಪುರ, ಚಿಂತಾಮಣಿಯಂತಹ ಗಡಿ ಪ್ರದೇಶಗಳಲ್ಲಿ ತಮಿಳು ಮತ್ತು ತೆಲುಗು ಭಾಷೆಗಳ ಆರ್ಭಟವೇ ಹೆಚ್ಚು. ಉತ್ತರ ಕರ್ನಾಟಕದ ಬೆಳಗಾವಿ ಕಡೆ ಹೊರಟರೆ ಮರಾಠಿ ಭಾಷಿಕರು ಹೆಚ್ಚಾಗಿ ಕಾಣಸಿಗುತ್ತಾರೆ.
ಇತರೆ ಭಾಷೆಗಳ ನೆಲೆ: ಅಷ್ಟೇ ಅಲ್ಲ, ಕರ್ನಾಟಕದಲ್ಲಿ ಸಂಸ್ಕೃತ ಮಾತನಾಡುವ ಎರಡು ಗ್ರಾಮಗಳು, ಸಂಕೇತಿ, ಕೊಂಕಣಿ ಭಾಷೆ ಮಾತನಾಡುವ ಜನರೂ ಇದ್ದಾರೆ. ತಮಿಳುನಾಡು-ಕೇರಳದ ಮುಸ್ಲಿಮರು ತಮಿಳು/ಮಲಯಾಳಂ ಮಾತನಾಡಿದರೆ, ನಮ್ಮ ಕರ್ನಾಟಕದ ಮುಸ್ಲಿಮರು ಉರ್ದು ಮತ್ತು ಬ್ಯಾರಿ ಭಾಷೆಗಳಲ್ಲೂ ಮಾತನಾಡುತ್ತಾರೆ.
ಇತಿಹಾಸದ ಕೊಡುಗೆ: ನಮ್ಮ ಕರ್ನಾಟಕ ಸ್ವಾತಂತ್ರ್ಯ ಪೂರ್ವದಲ್ಲಿ ಹರಿದು ಹಂಚಿಹೋಗಿದ್ದರಿಂದ, ಬಾಂಬೆ, ಮದ್ರಾಸ್ ಪ್ರಾಂತ್ಯ ಮತ್ತು ಹೈದರಾಬಾದ್ ನಿಜಾಮ್ ಪ್ರದೇಶಗಳಿಂದ ಮರಾಠಿ, ತಮಿಳು, ತೆಲುಗು ಮತ್ತು ಉರ್ದು ಭಾಷಿಕರು ಸಾಕಷ್ಟು ಕಡೆ ನೆಲೆಗೊಂಡಿದ್ದಾರೆ. ಇಂದಿಗೂ ಮರಾಠಿ ಭಾಷೆ ಮಾತನಾಡುವ ದರ್ಜಿ ಜನಾಂಗದವರು (ತಮಿಳು ಸೂಪರ್ಸ್ಟಾರ್ ರಜನಿಕಾಂತ್ ಕೂಡ ಮರಾಠಿ ಭಾಷಿಕ) ಮತ್ತು ತೆಲುಗು ಮಾತನಾಡುವ ವೈಶ್ಯ ಜನಾಂಗದವರು ಕರ್ನಾಟಕದಾದ್ಯಂತ ಸಿಗುತ್ತಾರೆ.
ಹೊಸ ವಲಸೆ: ವ್ಯಾಪಾರಕ್ಕಾಗಿ ರಾಜಸ್ಥಾನ ಮತ್ತು ಕೇರಳದ (ಬೇಕರಿ ಮತ್ತು ಕಾಕಾ ಅಂಗಡಿ) ಜನರು, ಕಟ್ಟಡ ಕಾಮಗಾರಿಗಳಿಗೆ ಉತ್ತರಪ್ರದೇಶ, ಬಿಹಾರ, ಒರಿಸ್ಸಾ ಮತ್ತು ಬಾಂಗ್ಲಾದೇಶದ ಜನರು ಬಂದಿದ್ದಾರೆ. ಬೆಂಗಳೂರಿನ ಅಪಾರ್ಟ್ಮೆಂಟ್ಗಳನ್ನು ಕಾಯಲು ನೇಪಾಳಿ ಗೂರ್ಖಾಗಳು ಇದ್ದಾರೆ. ರಸ್ತೆ ಬದಿಯಲ್ಲಿ ಗೋಲಗುಪ್ಪ ಮಾಡುವವರು ಕೂಡ ಉತ್ತರ ಭಾರತೀಯರೇ. ಭಾರತದ ಬೇರೆ ಯಾವುದೇ ಭಾಗದಲ್ಲೂ ಇಷ್ಟು ಭಾಷಾ ವ್ಯವಿಧ್ಯತೆ ಕಾಣಲು ಸಾಧ್ಯವಿಲ್ಲ.
IT ಕ್ರಾಂತಿಯ ಅಲೆ ಬಂದ ನಂತರ: ಬೆಂಗಳೂರು ನಿಧಾನವಾಗಿ ಏಷ್ಯಾ ಖಂಡದ “ಸಿಲಿಕಾನ್ ವ್ಯಾಲಿ” ಎಂಬ ಹೆಗ್ಗಳಿಕೆಗೆ ಪಾತ್ರವಾಯಿತು. ಈ ಪರಿವರ್ತನೆ ಬೆಂಗಳೂರನ್ನು ಬರಿ ಭಾರತದಷ್ಟೇ ಅಲ್ಲ, ವಿಶ್ವದ ಅನೇಕ ರಾಷ್ಟ್ರಗಳ ಜನರ ಕನಸಿನ ನಗರವನ್ನಾಗಿಸಿದೆ. ತಂತ್ರಜ್ಞಾನ, ಶಿಕ್ಷಣ ಮತ್ತು ಉದ್ಯೋಗದ ಅವಕಾಶಗಳ ಹುಡುಕಾಟದಲ್ಲಿ ವಿಶ್ವದ ವಿವಿಧ ಭಾಗಗಳಿಂದ ಜನರು ಇಲ್ಲಿ ನೆಲೆಸಿದ್ದಾರೆ. ಇಂದಿನ ಬೆಂಗಳೂರು ಮತ್ತು ಮೈಸೂರು ನಗರಗಳಲ್ಲಿ, ಕೇಂದ್ರ ಸರ್ಕಾರದ ಅನೇಕ ಪ್ರತಿಷ್ಠಿತ ಸಂಸ್ಥೆಗಳಲ್ಲಿಯೂ ಕನ್ನಡಿಗರಿಗಿಂತ ಪರಭಾಷಿಕರ ಸಂಖ್ಯೆಯೇ ಹೆಚ್ಚಾಗಿದೆ.
ಹಾಗಾದರೆ ಇವರ ಮದ್ಯೆ ಕನ್ನಡಿಗ ಕಳೆದು ಹೋಗಿದ್ದಾನೆಯೇ? ಇತರ ಭಾಷೆಗಳ ಮಧ್ಯೆ ಕನ್ನಡ ಕಳೆದುಹೋಗಿದೆಯೇ?
ಕನ್ನಡಿಗ ಕಳೆದುಹೋಗಿಲ್ಲ, ಬೆಳೆದು ನಿಂತಿದ್ದಾನೆ!
ಇಲ್ಲ! ಕನ್ನಡ, ಕನ್ನಡಿಗ ಅಥವಾ ಕರ್ನಾಟಕ ಎಲ್ಲೂ ಕಳೆದು ಹೋಗಿಲ್ಲ. ಈ ಕರ್ನಾಟಕ ಎಂಬ ದೈತ್ಯ ಶಕ್ತಿಯು, ಹೊಟ್ಟೆ ಪಾಡಿಗೋ, ವೃತ್ತಿಯಲ್ಲಿ ಏಳಿಗೆ ಸಾಧಿಸಲೋ, ಜ್ಞಾನಾರ್ಜನೆಗೋ ಬಂದಿರುವ ಎಲ್ಲರನ್ನು ಮತ್ತು ಎಲ್ಲಾ ಪ್ರಾಂತ್ಯದ, ಭಾಷೆಯ ಜನರನ್ನು ತನ್ನೊಳಗೆ ಸೆಳೆದುಕೊಂಡಿದೆ.
ಕನ್ನಡದ ವಿಶಾಲ ಮನಸ್ಸು: ಇಷ್ಟೊಂದು ಸಂಖ್ಯೆಯಲ್ಲಿ ಪರಭಾಷಿಕರು ಇದ್ದರೂ ಸಹ, ಅತಿ ಹೆಚ್ಚು ಜ್ಞಾನಪೀಠ ಪುರಸ್ಕೃತರನ್ನು ದೇಶಕ್ಕೆ ಕೊಡುಗೆಯಾಗಿ ಕೊಟ್ಟಿದ್ದು ನಮ್ಮ ಕನ್ನಡ ಭಾಷೆ. ಪರಭಾಷಿಕರನ್ನೂ ತನ್ನವರೆಂದೇ ಬರಸೆಳೆದು ಅಪ್ಪಿಕೊಂಡಿದೆ.
ಕರ್ನಾಟಕದ ಸಾಧಕರು: ಕೊಂಕಣಿ ಭಾಷಿಕರಾದ ಶಂಕರ್ ನಾಗ್ ಅವರು 'ಮಾಲ್ಗುಡಿ ಡೇಸ್'ನಂತಹ ಮಾಸ್ಟರ್ಪೀಸ್ ಕೊಟ್ಟಿದ್ದಾರೆ. ಮೂಲತಃ ತಮಿಳರಾದ ಆರ್.ಕೆ.ನಾರಾಯಣ್ ಅವರಿಗೆ 'ಮಾಲ್ಗುಡಿ' ಎಂಬ ಅದ್ಭುತ ಕಾಲ್ಪನಿಕ ಊರು ಸೃಷ್ಟಿಗೆ ಸ್ಪೂರ್ತಿ ನೀಡಿದ್ದು ನಮ್ಮ ಮೈಸೂರು. ದೇಶದ ಅದ್ಭುತ ನಟರಲ್ಲಿ ಒಬ್ಬರಾದ ಅನಂತ್ ನಾಗ್ ಅವರ ಮಾತೃಭಾಷೆ ಕೊಂಕಣಿ. ಕನ್ನಡದ ಆಸ್ತಿ ಮಾಸ್ತಿಯವರ ಮೂಲ ತಮಿಳುನಾಡು. ಬೇಂದ್ರೆಯವರು ಕೂಡ ಮರಾಠಿ ಮೂಲದ ಕವಿಗಳು. ಕನ್ನಡ ಚಿತ್ರರಂಗದ 'ಗೋಲ್ಡನ್ ಸ್ಟಾರ್' ಗಣೇಶ್ ಅವರ ತಂದೆ ಒಬ್ಬ ನೇಪಾಳಿ ಗೂರ್ಖಾ. ಉರ್ದು ಮಾತನಾಡುವ ನಿಸ್ಸಾರ್ ಅಹ್ಮದ್ ಅವರು ನಮಗೆ "ಜೋಗದ ಸಿರಿ ಬೆಳಕನ್ನು" ಕೊಟ್ಟಿದ್ದಾರೆ. ಅಜಿಮ್ ಪ್ರೇಂಜಿ ಅಂತಹ ಕನಸುಗಾರರಿಗೆ ದಾರಿ ತೋರಿದ್ದೇ ಕರ್ನಾಟಕದ ನೆಲ.
ಕನ್ನಡಿಗರು ಎಲ್ಲರೊಂದಿಗೆ ಸಾಮಾನ್ಯರಂತೆ ಬೆರೆತು, ವೈವಿಧ್ಯತೆಯಲ್ಲಿ ಏಕತೆಯನ್ನು ಸಾರುತ್ತ ಸಹಬಾಳ್ವೆಯಲ್ಲಿ ನಂಬಿಕೆ ಇಡುತ್ತ ಬಂದಿದ್ದಾರೆ. ಕುವೆಂಪುರವರ ವಿಶ್ವಮಾನವ ಯಾರು ಎಂದರೆ ಅದು ಕನ್ನಡಿಗನೇ ಹೊರತು ಇನ್ಯಾರು ಅಲ್ಲ.
ವಿನಯವೇ ನಮ್ಮ ಗುರುತು: ರಾಜಕುಮಾರ್ ಆದರ್ಶ!
"ಕನ್ನಡಿಗರು ಸೋಮಾರಿಗಳು," "ಸ್ವಾಭಿಮಾನವಿಲ್ಲದ ಜನ" ಎಂದು ನಾವೇ ನಮ್ಮವರನ್ನು ಅಪಹಾಸ್ಯ ಮಾಡುತ್ತೇವೆ.
ಕನ್ನಡಿಗ ಎಂದೂ ತಮಿಳರಂತೆ "ನಾವು ಶ್ರೇಷ್ಠ" ಎನ್ನುವುದಿಲ್ಲ, ಆದರೆ ತನ್ನ ವಿನಯವಂತಿಕೆಯಲ್ಲಿಯೇ ಶ್ರೇಷ್ಠತೆಯನ್ನು ತೋರಿಸುತ್ತಾನೆ.
ತೆಲುಗಿನವರ ತರಹ ವೈಭೋಗ ಪ್ರದರ್ಶಿಸುವ ಗುಣ ಕನ್ನಡಿಗರಲ್ಲಿಲ್ಲ. ಕನ್ನಡಿಗ ಎಲ್ಲರೊಂದಿಗೆ ಸಾಮಾನ್ಯರಂತೆ ಬೆರೆತು, ಜನಜಂಗುಳಿಯಲ್ಲಿ ತನ್ನ ಪಾಡಿಗೆ ತಾನಿದ್ದು ಬಿಡುತ್ತಾನೆ.
ನಮ್ಮ ಕನ್ನಡದ ಗುರುತು ವಿನಯವಂತಿಕೆ. ಆ ವಿನಯವಂತಿಕೆಗೆ ಉದಾಹರಣೆ ನಮ್ಮ ನಾಡಿನ ಶ್ರೇಷ್ಠ ಕಲಾವಿದ ಡಾ. ರಾಜಕುಮಾರ್.
ಕನ್ನಡಕ್ಕೆ ಅದರದೇ ಹೋರಾಟದ ಇತಿಹಾಸವೇ ದಾರಿದೀಪ
ಕನ್ನಡ ಭಾಷೆ ಪ್ರಪಂಚದ ಪ್ರಾಚೀನ ಭಾಷೆಗಳಲ್ಲಿ ಒಂದು. ಕನ್ನಡ ಸಾಹಿತ್ಯವು ರನ್ನ, ಪಂಪರಾದಿಯಾಗಿ ಇಂದಿಗೂ ಸರಸ್ವತಿ ಸಮ್ಮಾನ್ ಮತ್ತು ಜ್ಞಾನಪೀಠಿಗಳನ್ನು ಹೊಂದಿದೆ. ತೆಲುಗು, ಉರ್ದು, ಮರಾಠಿ ಮತ್ತು ತಮಿಳು ಸಂಸ್ಥಾನಗಳಿಂದ, ತದನಂತರ ಬ್ರಿಟಿಷ್ ಸಾಮ್ರಾಜ್ಯದಿಂದ ಸದಾ ಒಂದಿಲ್ಲೊಂದು ತೊಂದರೆ ಅನುಭವಿಸಿಕೊಂಡೇ ಕನ್ನಡವು ತನ್ನ ಅಸ್ತಿತ್ವವನ್ನು ಉಳಿಸಿಕೊಂಡಿದೆ.
ಜಾಗತೀಕರಣದ ಈ ವ್ಯವಸ್ಥೆಯಲ್ಲಿ ಕನ್ನಡ ಸೇರಿ ಪ್ರಪಂಚದ ಎಲ್ಲಾ ಭಾಷೆಗಳು ಇಂಗ್ಲಿಷ್ ವಿರುದ್ಧ ಹೆಣಗಾಡುತ್ತಿವೆ. ಆದರೆ, ಕನ್ನಡಕ್ಕೆ ತನ್ನದೇ ಹೋರಾಟದ ಇತಿಹಾಸ ಖಂಡಿತಾ ದಾರಿದೀಪವಾಗಲಿದೆ.
ಕನ್ನಡಿಗ ಕಳೆದು ಹೋಗಿಲ್ಲ, ಅವನು ಎಲ್ಲರನ್ನೂ ಅಪ್ಪಿಕೊಂಡು ಬೆಳೆಯುತ್ತಿದ್ದಾನೆ. ಇದೇ ನಮ್ಮ ಕರ್ನಾಟಕದ ಶಕ್ತಿ!
Comments
Post a Comment